For Our Land and Our People... Eima Râh nata Eima Chipho Chata..., Browser he Mozilla Firefox Hma bei ma ei!
Dr.Ngôchôle nata MSA PDF Print E-mail
Written by MSA   
Saturday, 30 July 2011 02:46

Marapa ta eimâ palai khei ngasapa, VOA liazy ta a aoreih eima thei tyhpa, Dâryhpa ( Law) liata Doctorate hnei chhôhpa Dr. Ngochole (Rachothapaw) nata MSA zy patlapasaona cha atahmâ eima vaw palâsa. Eima Mara râh chhoh liata Nôpawzy nata Marasawzy ta ano thâtih siapa nata araihria he pahno byuh kaw eita, cha Marasawzy pahnoh khohpa nata pahno byuhpazy pahno sa thei nawpa ta MSA ta eima raihria achâ tahpa ta apypa nata Marasaw hry ta nôpawpa nata âluah patluapa achâpazy palyupalih awpa he eima raihria hawhta eima pachâpa vâta atahmâ Dr.Ngochole nata ano thâtih nata raihria, hmona, apyhnazy kâchhiena hnei leipa ta hiahripa châta ano chhaota arei khohpazy asia kawpa ta miah âchhy hra. Ary liata he ano nata eima hiahrina nata achhynazy cha achâ. Vaw reih khai chyu teh u.

 

Dr.Ngochole naat a viasa no
Dr.Ngochole nata a Viasano Ngotetia (Photo- Maraland.net)


 

 MSA -   Ahmiasa tuata Khati ta USA tlô chita,khâpa  University kiah chita , khâpa  Degree zy na hmô tahpa detail he eima pahno byuh kaw?

Dr. - The United States of America (USA) he October 24, 1996 noh ta ei vaw tlô. The United States Information Agency (USIA) scholarship ei hmôpa vâta ei vaw tlôpa a châ. Indiana University Bloomington liata Intensive English Program (IEP) kiah nata, cha khai tawhta University Entrance Exam tao nahta, ei tloh theipa  vata, Valparaiso University liata admission ei hmo. Valparaiso University liata 1997 tawhta 1999 taih châ achu nata, B.A., International Economics and Cultural Affairs degree ei hmô. Indiana University liata Master of  Law (LL.M) he 2002 liata ei hmo. Master of Laws ei patlo tawhta Doctor of Juridical Science (SJD) he admission hmô heih nata 2007 liata ei patlô. 2007 liata SJD degree ei hmô khai tawhta, Post-doctoral Fellow ta appointment na pie ei ta, atahmâ taih he Postdoctoral Appointee ta Indiana University School of Law, Bloomington liata rai ei hria.

MSA - Atahmâ khapa raihria e na chakao hai? Khâpa deparment liata khâpa position(?????) ma na chakao?

Dr. - Atahma he position sâno ei hnei. Sâkha na cha Postdoctoral Appointee (????????????? ??????)  a châ. Chatawhta, Center for Constitutional Democracy liata Assistant Director ei châ. Center for Constitutional Democracy he keima nata ei Professor pa David Williams ta eima padua pa acha.

MSA – Arôhnah kaw ! Cha position (?????) liata khâpazy e na hria chaichai?

Dr. -  Aw. Ei raihria cha Postdoctoral Appointee nawh he, Indiana University School of Law tawhta assignment miah a ma piepa eima tao. Châ eima pachu. Ph.D., siku hawti nawh supervise ei tao. Center for Constitutional Democracy raihriana zydua he, keima tawhta manage ei tao. He he ei raihria chai pa a châ. Nohkha ta simalâh dawh 8:00am  tawhta dawh 12:00 am taih rai he eima hria lymâ.

MSA -  Aw! Chatlaichu! Chakhiah .  Sawhkhâ rai leipa ta ahropa phupy liata na hrianazy maih chho teh? (Pakhona ta NCGUB, CNC,ENC etc.liata na chakaonazy a y khiah)

Dr. - He kyhzy he cha security kyh  vâta rei awpa pha aw vei.

MSA – Aw ! Chatama ? Na raihria kyh cha soh chy sih la, na palôhphao kyh bâh eima chaw hiahri tua bâ aw. Thokhazy ta Râchothâpaw he Marapa châta hria thai vei, Chin State level nata Union level dei ahria tahpa ta ama reih. Âdo ma? Âdo khiah khâpa vâta e?

Dr. -  Achhy khohchhih ngaita kawpa achâ. Mara râh cha, Chin State chhôh liata y ta, Chin State cha, founding member of the Union of Burma a châ. Chavâta, Union level liata raihria pa chhao he, State and Local level châta châ thei ta, Local nata State level liata raihriapa chhao he, Union châta a châ thei. Chyhsa ahyrai ta, â mo nata a ma “talent” chyu ta, mopho nata râh châta a ma hria theina nata a ma hria thaina lâ tawhta a ma hria'pa he a pha eita. Union châta châ se, State châta châse, Local châta châ se, ei tao ei hria theipa a y khia cha, hria lymâ awpa nata tao lymâ awpa he ei khoh chaipa tlao a cha. Chyhsa rei papha awpa khohna vâta hriapa châ leipa ta, hria a byuh ta hria thai awpa rai eima hria kalâ awpa he apha chai ei tâh.

MSA – Achâtlai ! Chin State liata Chipho pachiahpa 53 râhchhôh a y tahpa ta pahnopa châta chazy hry liata Marapa chhao he âpahlaopa châpi ta, Chin State level ta 2010 election liata Party 3 a ypa hry ta Marapa chhaota ENDP tahpa ta aeihrâhpa ta Party ama paduapa he zaw kheih ta e na hmô? Chin râh liata Chin chipho hropazy nata apananopa ta aeihpa ta aduapa vâta Marapa athôh kheina nata phahnaina a châ hlei aw ma?

Dr. - ENDP a duapa kyh chhao a ly kaw nata, Puhpa Va Chei atlohpa chhao ei ly khei kaw. Marasaw he Burma politics liata a mopâ tlâh awpa eima châ. Puhpa Matlei, Puhpa Rô U, nata atahmâ Pupa Vâchei zy duahmo he ta, Marasaw politic liata hmah eima siena a palâsa kaw. MPP kha moh pha kawpa châta, ENDP chhao kha a pha kawpa chhao ta, Mara Progressive Party tlyma, Mara National Party tlyma paduapa châsala apha via pachai heih aw. Achhâpa cha, Mara identity âdua kheipa Political Party eima hnei theipa kha a pha kawpa ta ei pahno. Kaokha lâta pachâ awpa a y hrâ pa châ, ENDP a châpa chhao, kheihawpa Party eima padua pachhao, Marasaw nata Mara râh châta rai a hria thaipa, a hria khohpa, a hria theipa, Politicians zy eima patloh papua thei lymâ aw pa âbyuh.

MSA - Nâma ta na reipa hawhta ngaizaw politics nata ngaihraih politics tahpa hryta Marapa he khâpa politics ma eima hmâ khiah apha chai aw?

Dr. - Ngaihrai Politics nata Ngaihzaw politics ei tahpa he adaihti nata asu, hmo yzie nata hmo sivawna dâh chô liata mo thai awpa âbyuh. He political theory he su to liata hmâ apha pa “apply” tao ta hmâ thei awpa tahna châ vei. Local level liata Mara Local Party a y pa kha â byuh. Kha kha ngaihrai politics cha a châ. Anodeikua, State nata Union level liata, ngaizaw politics he eima hmâ aw pa âbyuh. He hawpa political theory he eima hmâ ti “apply” eima tao tita, a hmâzie nata a sikhei zie eima pahno thai awpa apha.

MSA – Tlâ reihpazao sih la, Marapa hmahsie thei nawpa ta nata hlaotloh lymâ thei awpa ta sâkhana ta âbyuhpa cha Township hnei thei awpa tahpa he âdo na tah mâ? Township hlâta âbyuh via chypa taotua awpa a y na tah mâ?

Dr. – Keima ei hmona ha hawhta achâ hri. Marasaw zydua Township sâkha chhôh liata y thei aw pa cha khohkhai pa achâ. Anodeikua, Township hlâta a peimawh viapa cha Marasaw zy achuna kyh liata thata hmah eima sie awpa â byuh. Mara Students Association(MSA)  members a châpa zydua, châ nâmâ chuna liata athai chaipa châ a chhua kalâ u la, Mara Township sâkha dei cha vei. Township sâthôh chhao eima hnei thei. Achuna kyh liata tiama papua ta hlaotlohna heta hmoto atao thei. Township he ta hmoto tao thei vei.

MSA – Aw! Biedo kawpa achâtlaina. Marapa pi he maluh chyh kawpa eima châ hleikhô ta township sâthôh ta pachhaihpa eima châ heihpa vâta politics liatazy,township hmo theina liatazy eima hlaotlohna rai aru ama tâh. Maluh chyh kawpa eima châna he eima hlaotlona aparusa chaichaipa achâma?

Dr. - Maluh hluh kaw ta dyu atlai leipa hlâta, maluh chyh kaw ta hlao atloh kawpa mopho châ awpa he pha via vei ma? Kao kha lâta pachâ awpa cha Marasaw he maluh chyh ma pi. Notla Marasaw nata Nochhi Marasaw eima zydua ta 70,000 râhchhôh eima châ. Lai nawh nata eima kho hlâ. Kyh hlupi vâta râh nanopa liata y pi ta, Nochhi Marasaw chhao he Township 3 liata rai patlâhpa eima châpa vâ deita a châ. He hawhta râh nanopa liata eima yna nata township hluhpi liata pachhaihpa eima châna he ahmâzie eima thai awpa â byuh.

MSA - Thokha ta maluh chyh kawpa Marapa eima châpa vâta chihropazy hmiakô liata noza ama tah tyh. Nâma hâ Marapa na châpa vâta Chin chihropazy nata nama y khoh tyh no ta paloh buanazy tlyma, noza kheinazy tlyma na hnei ma?

Dr. - Marapa ei châna vâta chihropa hmiakô liata nozana, palôh buana tahawhpa rairai hnei va nâ. He hawhta chihropa hmiakô liata riaphana nâ pietuhpa he achuna he achâpa ta ei pahno.

MSA – Avao tlâhpa bie acha ! Chakhiahla . Sipasa kawpa Marapa pi he Chin chipho hropazy ta miah ama mohnao ma? Nâma experience liata miah ama mohnaona, mo pahnainazy na hmô tyh hra ma?

Dr. -  Na hiahrina cha bâh chaw ei tua sy  ! “Sipasa kawpa Marapa” tâhpa he ado kaw vei. Marapa liata sipha hneirôhpa ama ypa hawhta, sipasapa chhao eimâ y hra. Chipho hropa zy chhao chahawhta ama châ hra. Mongyu nawh zydua rôhnah veih ei. Viah nawh zydua hneirôh khai hra veih ei. Lai nawh zydua rôhnah khai hra veih ei. Atanoh taihta ABEIPA ngiachhiena vâta  Marasaw ku adaopa ei hmo mâh leipa he Marasaw eima hneirôhna palâsana châ hlâ vei ma?

MSA – Chata tlai raw chu ! Marapa thyutlia Siku hawtizy palôh liata eima Myanmar râh sipasa tupa vâta nata eima khihsa aru tubâpa vâta nata sawhkhâ raihria chhao âthôbah thai khaoleipa vâta râh hro lâ puata ahlaofâh ta Refugee zy ta y laih awpa ta khohna ama hnei hluh kawbâ. Siku kia akhohpa ama chyh kaw bâ. Ama nôpawzy chhaota râh hro sie ta ahlaofâh awpa he khokhei viabâ eita achuna hmia ama pasah chyh kawbâ. He kyh nata azaopa ta khâpa bie e na rei khoh?

Dr. - Thyutlia zydua châta aphachai pacha achuna liata tiama papua ta hlaotloh awpa he a châ. Achuna apahâh kawpa thyutlia zydua kha nôpaw nata chhôhkha ta baothei chhôhna hawhta bao awpa âbyuh. Marasaw (keima chhao) daihti vâropi achuna liata hlao eima vaw tloh thai tyh leipa kha, nôpaw sanawhzy ta achuna mâ ahnei zie “value” a ma pahno thai lei vâta avaw châ tyh.
Sipasana atiah tuhpa he thaina sona a cha. Phusa tâka châ vei tahpa palôh eima hnei awpa a pha. Refugee kyh he, Via pheisainawh  porter a phao khoh leipa taihta hmo theipa achâ. Mohnao awpa châ vei. Rahro lâ eima tlopa chhaota, achuna ky liata eima tiama lei khia cha “nikhi bawkhi” liata eima chhâ alo pyly aw. Chavâta, thyutlia zydua ta eima râh lia eima y pa chhao, râhro lâ eima puapa chhaota  achuna liata tiama eima  papua awpa nata hlaotloh eima chhua awpa he a peimawh chai.

MSA – Ahro kyh chy bâ se .VOA liatazy ta interview tita, he ei bierei haipa he Ei pilâhpa Marasawzy chhaota ama nahthlie ngalâ hra aw tahpa ta na pachâ tyh tlâma?

Dr. - Interview miah a ma tao tita pachâ chaipa cha  khâpa kyh ma eima rei tahpa nata  kheihawhta achhy sala, zawpi châta apha chai aw tahpa ngala ei pachâ. Ahyma nahthlie awta, ahyma athei aw tahpa he pachâ vana. Chadei châleipata, keima ei pahno pasia leipa thâtih hiahrina a y tita, pahnovana tahpa rei ngâh awpa he a peimawh chaipa ta ei pachâ. Khizaw liata chyhsa ahyrai, ato zydua apahno khaipa y phôh  a châ leipa vâta, bie miah ama hiahripa kyh he interview miah ama tao chhoh  ei pachâ chaipa a châ tyh.

MSA - . Myanmar râh he Democracy noh achhi haw tah theipa achâma? Kheih ta e eima râh he avaw châ laih aw? He duahmo tawhta avaw pha via laih thei awma? Atahmâ ta sawhkha he ta Democracy pasôpa ta râh hmahsiepa nata sidiahpa avaw pachâsa aw tahpa ta nâ pyh ma?

Dr. - Democracy he chyhsa athaipa nata asohpa nawhta ama taopa Mawtawzy hawhpa chaleipa hawhta châ leipa ta, lâthloh liata hao “khâ” ngalâ awpa hawhta apachâpa eima hluh kaw. Democracy cha arâh chyhsa zydua nata a pazaopa a châ. 1962 tawhta 2010 taih  kô 40 hlei chhôh, pheisai sawhkhana ry liata eima yna apasi tupa vâta, democracy he khâpama alyu, kheihtama alaiseih thei aw tahpa apahno leipa eima hlu via. Chavâta, atahmâ sawhkhâna thiehpa heta democracy apuakhei awpa cha pangiasa vana. Chârasala kô 40 hlei chhôh, amoh chhao eima theileipa democracy eima hnei thei nawpa lâthlôh  liata eima y haw. Eima sienawpa lâthlôh  ruta, seihta, athuta, asâh ta rietheina hluhpi eimâ tyh awpa he eima my lei awpa apha.

MSA – Chakhiahla ,Marapa ta eima hnei chhôhpa State Hluttaw MP. Vâchei hnohta khâpa bie e na tae khoh?

Dr. - Utae Secheipaw he daihti vâropi eima pahnopa vaw châta thata ei pa uhthei sa kawpa a châ. Achô liata rei chiehpa hawhta, 2008 Constitution chhôh liata State Sawhkha biehneina he, achyhta ngala a y tahpa pahno khaipa a châ. Chavâta, Marasaw châta rai hluhpi hria khoh hra sala hria thei nawpa lâpi a buah kaw. Chavâta, pachâna pie aw pachhao a ru ngaita.
Pheisai sawkha ryureina liata daihti v
âro eima vaw y vâta, State Hluttaw tlyma, Union Hluttaw tlyma eima tlôpa ta nata, ato apahno khaipa hawhta pachâ pathleina a y thei. He tawhta pachâna hnei pathlei lei awpa a peimawh chai. US President Obama yna White House liata Staff a hneipa he  350 râhchhôh châ ei ta, he Staff  nawh he ta, President raihriana 100 liata 50 cha ama hriapa a châ. Chavâta, Marasaw nata Mara râh châta raihria akhohpa zydua pahmaopasao thaipa ta, amo nata ama talent chyu châ liata ahmâ thai awpa a peimawh chai.
Achh
âna liata,State, Division or Union Hluttaw liata Member a châpazy rai cha, “Legislation” châ ta, 1958 ko liata a hnoh chaipa ta Print ama taopa Burma Code (Volume 1 to 13) he review awpa ama rai a châ. 1962 tawhta 2011 taih Pheisai sawhkhâ ta dâh nata râh ryhpa ama phuapa zydua he 500 râhchhôh  y ta, he zydua he review a ma tao'pa ama rai a châ. Chavâta, Marasaw Law Officers nawh, Lawyers nawh, Mara  nôpaw nawh zydua nata patlapasao parei awpa âbyuh.

MSA - Marapa ta apaduapa ENDP nopawzy hnohta khâpa bie e na tae khoh?


Dr. - Democracy eima khoh khiah cha chyhsa pakha, py kha pach
âna nata a ma tovyuh  kha eima pa uhthei sa awpa a châpa hawhta, ENDP a ma paduapa chhao a pha ei ta. Anodeikua, ENDP Constitution nata Byelaws nawh he ei rei tlâ lei vâta, khâpa hmâhta pachâna pie awpa hnei va na. Marasaw nôpawzy châ ei ta, Marasaw châta tao thei awpa hmo kheihawpa rai aphachaina hawhta ama tao nahta ei pangia sa.

MSA - Marasaw zydua hnohta khâpa bie e na rei khoh?

Dr. - Nochhi Mara râh ei kaw vâ kaw. Notla Mara râh he cha, kôkha ta eikha ei kaw tlô thei tyh. Ei dawhkâh liata Map lai ngaitapa hnei nata, nohkha ta eikha he mo lei ta y thei va na. “CHÔ KHAZO ta ry rao hei sala, atlâhpa ta eimâ tyh aw, atlâhpa ta”.

MSA - MSA nata Mara siku hawti zydua hnohta bie na chho khohpa ..?

Dr. - Siku hawti rai cha, châ a chu awpa nata châ thai awpa a châ. 2020 liata  Marasaw  Siku hawti hryta Ph.D. degree a hneipa 25 eima hnei thei khiala, ahyhmâhta miah mohnao aw va ei. 2040 liata Ph.D degree a hneipa 50 eima y thei khiala, Marasaw zy ta sadu eima zathlie lymâpa 100 liata 50% cha eima tao thei cheingei aw. Achuna kyh liata palôh 100 liata 100 vaw soh muh vei.

MSA – Aphahnai kaw awpa bie sôh kawpazy sai achâ. He hawhta na rai buana hry liata hiahrinazy palôhpasi kawpa ta, asia kawpa ta miah na chhy theipa vâta MSA eimâ châ ly ngaita kaw.

Dr. – Kei chhao Eima râh nata Chipho châta âdua pahreihpa ta ahria ngalâpa MSA nopawzy nata sahlao zydua chô liata alyna chibaih ei châ bu ei.

 

( Dr. Ngôchôle he Taubu khihpa chata tahma USA liata apahrâ ngalâpa achâ. Ngoteite (Nguatin tian) ama tahpa viasa nô hneita atahmâ saw chapaw uthei chaipa Râchôthâ ( Kô 3) ama sa. Chavâta Râchôthâpaw/Râchôthânô tahpa ta awpa ama châ. Atahmâ 5104 Heathwood Dr, Indianapolis, IN 46237 liata palôhtlâh kawpa ta chhôhkha aki kawpa ta ama pahra ngala)

 

He interview hlaotloh thei nawpa ta miah abuabâ khei chaipa Paw  Thazama ( Moderator of This e-mail address is being protected from spambots. You need JavaScript enabled to view it nata Former MSA AGS) chô liata alyna bie eima hlâ hra.

 

Mara Students Association

































Last Updated on Sunday, 22 January 2012 03:46
 
 

Peimawhpazy!

Featured Links: