For Our Land and Our People... Eima Râh nata Eima Chipho Chata..., Browser he Mozilla Firefox Hma bei ma ei!
Beipari Sôh Theology PDF Print E-mail
Written by MSA   
Tuesday, 21 June 2011 09:16

Beipari Sôh Theology

1. Biehmiapa

Beipari sôh he Awnanopa liata sôhnawh rônâh kawpa miakha châ tarawta Mara Evangelical Church Awnanopa ta a khâsia phahla kawpa sôhnawh a châ. “Khâsia phahla” tahna cha MEC Awnanopa ta sôh mohohna liata dyu a tlai leina lâchhâh ta rei khohpa châ hlei leipata Beipari sôh nata azâopata Khazohpa bie he eima MEC râh liata a phualuah mâh vei tahna ei rei khohpa a châ hri. Beipari sôh he MEC Awnanopa liata cha KNP department ta a vaw vao tua ta, a hmâna deikua cha hârâ-nôhmei deichhyna liata a hmâh. Cha tawhta local nôpaw nawh ta a vaw vao heih eita local church fund châta ama vaw hmâh heih hra. 2006 tawhta Beipari sôh cha MEC Awnanopa ta Centenary fund châta vaw paheih heih ta, 2008 deita tawhta mission chakaona châta a vaw hmâ pathaopa a cha. Chavâta MEC Awnanopa liata Beipari sôh he thyuna châh dei vaw pahno pita hmâna policy sianopa vaw hnei mapi tahna a palâsa. Thyuna chhao he hmâna policy sianopa eima vaw hnei leipa vâta ryhpa miakha hawhta tlâ eima tao chakhyh tyh. Hârâ-nôhmei deichhyna châta tlymâ, local fund châta tlyma, nata centenary fund châta tlyma eima hmâ tyhpa cha a hmâna su do lei kawpa liata sôh khâsiana a châ. Achhâpa cha â duana Khazohpa bie a y leipa hawhta a châ. Mission chakaona châta hmâna deikua he Khazohpa bie â duana ahneipa hawhta pahnopa a châpa vâta, kaokha lâta, ahmâna su dopa liata sôh khâsiana tah theipa a châ. Mission chakaona châta Beipari sôh hmâpa he sôh mohohna dopa hawhta pachâpa a châ tarawpata thyuna lâ kyh liata cha hmâna policy sianopa eima hnei hlâta eima tao tyhpa hawhta a vaw cha chy pyly. Chavâta he paper ta â chhuah chaipa cha Beipari sôh he mission chakaona châta Zisu Krista a pahâsa chaipa pati a châ tahpa liata aduapa ta thyuna nata hmâna palôhru phao pahneisa awpa he a châ. Anodeikua he paper ta Beipari sôh theology reih paki tiahrâh aw vei, pahruana rakha deita a châ aw.

 

 

2. Mission, Beipari Sôh: hawhrawhzy chhopasiana

Mission tahpa hawhrawh he Biehrai liata y vei hrasala theology achuna liata technical hawhrawh (word) peimawh kawpa a châ ama tah. Hawhrawh deikua cha Latin reih “missio” tuapa- tahna tawhta a vypa a cha ama tah. Chavâta misson tahna yzi cha “raihria miakhakha chakao awpata tuapa” tahna a châ. Sawchapawpa Zisu Krista cha khizâw chyhsa pachhana raihria awpata Paw Khazohpa ta a tuapa a châpa vâta, athaipazy ta “Missio Dei” tahpata ama rei tyhpa kha a châ. He liata eima rei khoh chaipa cha Zisu ta a reipa hawhta “ Nâ tuahtuhpa khohpa tao’pa nata a raihria pangoh’pa cha ei pati a cha (Zhn. 4:34), Zisu Krista raihria he mission chakaona a châ.

 

Beipari sôh tahna dei he chhopasiana ei hmô beih leipa nata ei tao beih leipa a châ. Chavâta nôpaw khohchhihpazy ta miah chho ei sala ei ngiabâh kaw ei. Awnanopa hluhpi ta Beipari sôh cha sôhnawh miakha hawhta vaw hnei eita, keimozy ta eima pahno theina rakha liata cha Mizo Awnanopa ta he liata byhna a to khei kawpa a cha. Burma reih ta “Letasosah” tah ei ta, a yzi cha “ku pazahkha ta piepa sôh” tahna a châ. Beipari sôh cha eima beihpari liata eima hneipa sapha zy thyuna tawhta hmôpa sôh a châpa vâta Beipari sôh eima tahpa a cha. Beipari tahpa chhao he a yzi ahnei kaw aw. Achhâpa cha Beipari he eima hrona châta sapha eima sona a châ. Chavâta theologically ta Beipari tawhta Khazohpa eima zaona he hrona tlai ta Khazohpa eima zaona a châ hra. Paw Khazohpa ta Sawchapawpa Zisu Krista hmâpa ta a hrona maniah pie ta keimo chhao ta eima Beipari hmâpa ta Khazohpa eima zao hripa a châ hra. Cha naihta Beipari sôh he Awnanopa sôhnawh zydua hry ta a rônâh chaipa a châ thei aw.

 

3. Beipari Sôh nata Biehrai Parohpa

Nôpaw hluhpi ta Beipari sôh he Biehrai Parohpa Theihthaipazy châbu tawhta aduapa ta pachuna maniah ama hnei (Thei. 2:1-3). He châbu tawhta hmo (principle) achu awpa hluhpi a y aw. He kyh he Niepa hlâna thâtih a châ. Niepa hlâna tao tita, miakhana liata viahdi di kawpa chei awpa a châ aw (v.2). A yzi cha Beipari cheingei he cha sapha chiepa sona a châpa vâta sawvâ nata alyu vei. Sawvâ deikua sâho sona a châ. Chavâta niena hlâna tahpa cha sâho ta pie theipa châ leipata viahdi di kawpa hawhta Beipari tawhta sapha cheingei pie awpa a cha. Mianona liata viahdi dipa, sathaw nata deiry (rohpahâhpa) zy chhao ta theithaipazy lâta ama vaw chei awpa a châ.  Cha tawhta theihthaipazy ta kupazâhkha la ei sala Abeipa lâta mei raopata ama hlâ awpa a châ (v.3). Kupazâhkha la khai ta alaibâhpazy deikua cha theithaipazy nie awpata sopa a châ. Chavâta Biehrai Parohpa liata cha Beipari sôh he theihthaipazy nie awpa châta a cha. Miathôhna ta cha Niena hlâna châta thyu awpa he a ziepa thliena y vei. Buddhist nawh ta ama theihthaipazy châta saot nie ama pie tyhpa cha achyh ta sai ta thyu taraw eita ama Phonekyipazy niepa â kadaih pylypa a châpa hawhta Biehrai Parohpa liata chhao ama theihthaipazy nie â kadaihna taih ama pie awpa pangiasapa a châ. Theihthaipa ta kupazâhkha alapa he Burma reih ta Beipari sôh ama reizi hawhta pachâpa ta kupazâhkha ama pie tahpata apy awpa châ vei. Chavâta niepa hlâna liata athyuna zie awpa thliena a sia vei, anodeikua theihthaipazy ama nie awpata angâhchhâpa hawhta apy theipa a cha. Niepa hlâna liata sathaw nata ropahâhpa kyh he la rei mâh aw mapi. Sapha kyh reih chy awpita âhmie kyh la reih mâh leipata eimâ so chy aw.

 

4. Beipari Sôh nata Biehrai Thiehpa

Biehrai Parohpa liata cha eima rei chiehpa hawhta Beipari sôh (niepa hlâna) cha theihthaipazy nie awpa a châ. Biehrai Thiehpa liata deikua Zisu Krista ta a pahâsa chaipa pati lâta a vaw lie haw. Thâtihpha Zawhana châbu 4:1-42 liata eima rei tita he apyna he hmô theipa a châ. Zisu nata  a pachupazy cha Zudia râh tawhta Kalali râh ama sie nota Samari râh ama sie pahlie (4:3). Samari râh Saika khih kiapâh liata nochhô lichih ta ama tlô(v.6). A yzi cha ama riethei, nodi dahphi chaina daihti a palâsa. Chavâta a pachupazy ta khih lâ lâchao chalei awpata ama zu (v.7). Zisu deikua cha Samari chano nata Zakaw tikhaoh kiahpâh liata bie amâ chho (v. 10-26). Khih lâta lâchao a chaleipa a pachupazy cha vaw tlôpâ eita, Zisu nata Samari chanô chhao bie amâ chho khai haw hra. A pachupazy ta ama noâh kawpa miakha cha Zu chyhsa pakha a châpa Zisu ta Samari chanô nata bie amâ chhopa he a châ. Zu nawh ta Samari chyhsazy cha a pathaih leipa hawhta amâ pypa vâta bie a chho hraoh lei awpa nata ti a do hraoh lei awpa a châ. Cha hawhpa duahmo tawhta Zisu nata Samari chanô bie a chhona cha a pachupazy ta ama noâh kawpa a châ (v. 27). Chahrasala ahy hmahta bie hiahrina tao tlâ veih ei. A pachupazy cha Zisu a nodi kaw bâ awpa pachâ eita lâchao ama vaw chaleipa cha nie awpa ama hrua (v. 31). Zisu ta â chhy eita, “nama pahno leipa pati nie awpa ei hnei, (v. 32)” a tah. A pachupazy heih chata ahyzy tlyma ta niepa ama pie khiah maw? tah eita, Zisu bie reipa novâh veih ei (v.33). Zisu ta a chhopasia cha “ Nâ tuatuhpa khohpa tao’pa nata a raihria pangoh’pa cha ei pati a châ” tah ta (v. 34). Cha liata a sia kawpata novâha chhihpa cha Zisu ta Samari chanô nata bie ama chhona he Samari chanô hnohta thâtihpha a chho ngapa hawhta a châ. Ano thâtih a pahnosana a châ. Zisu Krista pahnopasiana he chhâzâw hrona (pachhana) (Zhn. 17:3) a châpa vâta Zisu Krista thâtih pahnosana he pachhana raihria a châ. Chavâta Zisu chakaona raihria cha mission chakaona a châ. Lâchao hlâta mission chakaona he Zisu châta a pahâsa viapa pati a châ. Cha kyh vâta MEC Awnaopa ta Beipari sôh he mission chakaona châta eima vaw hmâpa a châ. Chavâta Beipari sôh eima thyu no chhao Zisu Krista pati piepa hawhta palôh phao awpa a châ haw.

 

5. Beipari Sôh nata A peimawhna

Beipari sôh he Awnanopa ryhpa miakha hawhta pachâpa châ leipata hmo peimawh (urgency) a hnei kawpa a châ. Nôpawzy ta maniah chho eita “ Sâhriana daihti liata eima mo pathla tlamaw haw sila ahuana daihti y vei” ama tahpa hawhta mission chakaona chhao he a para kaw awpa a châ. Zisu chhao ta reih ta Paw khohpa taona nata a raihria pangoh awpata sâhzy hria awpa a hmoh khaipa hawhta pachuna a hnei (Zhn. 4:35). Zisu Krista ta a rei heihpa cha nodi dâhphi kawpa a châpa chhao ta mission chakaona (Samari chanô hnohta a thâtih chhona ) a peimawh viapa ta â tlyh. Chavâta Beipari sôh he keimo nie awpa sapha eima hnei khao leipa chhao Zisu ta ano nodi dâhphipa a papeisa khao leipa hawhta Beipari sôh papeimawhsa awpa a châ.

 

6.Beipari sôh he Bieparupa a châ

Biehmiapa liata ei palâsa haw chiehpa hawhta Beipari sôh he keimo MEC Awnanopa liata chhao bie nyupa hawhta a châ. Bie nyupa (mystery) tahpa he cha chyhsa hluhpi ta ama hmô pasia thei leipa a châ. Zisu Krista tlai ta, “nama pahno leipa pati nie awpa ei hnei (Zhn. 4:31)” tahpata reih. A yzi cha a pachupazy ta Zisu Krista hnohta ypâ hra kaw nga hra ei sala Zisu ta a pahâsa chaipa pati vaw pahno veih ei (Zhn. 4:33). Bie nyupa tahpa cha bieparu tah theipa cha ta, chyhsa to ta ama hmô/to thei leipa biehmeiseihpa a châ. Kao hropa lâ tawhta eima rei khiah, bie nyupa (bieparu) cha â phualuahna daihti a hneipa a châ. Chavâta keima ta ei pyna dâh ta cha Beipari sôh pahâhna he MEC liata kô vâropi nyupa vaw cha hrasala, atahma tawhta ochhi â vaw pahy hawpa hawhta a châ ei tah. A yzi cha Khazohpa ta Beipari sôh liata pahâ awpa maniah a khokhei chaina daihti eima tlô haw tahna a châ hra. Chavâta Beipari sôh kyh he riahpha ngâsâpa ta phuahluah suh vy.

 

7. Beipari sôh he Biepie Rônâh chaipa a châ

Beipari sôh he Zisu Krista pahâsa chaipa pati a châ tahpa eima reih khai haw. Niedo (viahchhâ) he chyhsa hrona a châ. Zisu ta “viahchhâ deita hrona châ vei, Khazohpa pakah tawhta a puapa bie …. (Mt.4:4)” tahpa ta a reipa kha viahchhâ he hrona châ vei tahna châ hlei vei. Rei khohpa cha viahchhâ cha chyhsa hrona a châ hra tahna a châ hri. Chavâta eima hrona a châpa viahchhâ (sapha) ta Zisu nie awpa ta eima piepa he eima hrona eimâ chhaih ngâpa hawhta a châ. Eima hrona tlokhuh ta Abeipa kyhpachâna a châ. Ryhpa pachutuhpa Saduasi hnohta Zisu ta a reipa cha “Abeipa na Khazohpa cha na palôhru, hrona, nata thatlôna tlokhuh ta kyhpachâ awpa he biepie rônâh chaipa miakhana a châ (Mk. 12:29).” Khizâw chhao ta a rônâh chaipa ta a pahnopa baona (donation) cha thisaih ta baona (blood donation) ama tah. A chhâpa cha thisaihliata hrona a ypa vâta a châ. Chavâta eima hrona hmeiseihpa Beipari a chhaihna he a rônâh chaipa nata eima hrona tlai ta Khazohpa kyh eimapachâna achâ. Beipari sôh thyuna ta biepie rônâh chaipa eima patlô thei aw. Mianona liata nâ kyh nâ pachâpa hawhta na vaih kyh na pa châ awpa a châ. (Maka 12:31). Mission chakaona he kyhpachâna vâta chakaona raihria a châ. Eima vaihzy cha Zisu Krista ta areipa hawhta phihhmâh penawh ta ama tupa lâlai kiahpâh liata ama thypa baotuh a hnei leipa, chyhsa hluhpi ta ama chahrih ngâpazy ama châ(Lk. 10:25-30). Cha hawhpa chyhsazy pachhana châta Beipari sôh cha hmâ ngâpa a châ. Chavâta beihparisôh thyuna cha biepie rôhnâh chaipa mianona chhao a châ hra. “ Biepiepa” tahpa cha ei thei leiawpa hmo châ ta, Mongyuh reih ta imperative mood ta hmâ tyhpa a châ. Cha cha tao cheingei awpa, ei ngâ hraoh leiawpa nata reingia kawpa ta biepiepa hawhta tao awpa a châ. Chavâta Beihpari sôh cha biepie rôhnâh chaipa a châpa vâta ahy hmah ei thei awpa cha leipa ta thyu cheingei awpa a châ.

 

8. Beipari sôh he Zunawh ta Shema hawhpa a châ.

MEC Awnanopa liata Beipari sôh Beipari sôh ama vaw pathao tuano rachhôh liata cha Beipari sôh byh liata roh awpa ta eima missionary nawh ta châ (Khazohpa bie) ama taopa cha Hlazy 30:4, “ Chakeihbarôhhneipa chhao tlai niepa a phahlapa ta anodi tyhta Abeipa bie a zyhpa deikua cha hmo phapa a phahla veih ei,” tahpa a châ. A yzi cha Khazohpa bie he Beipari sôh ama thyuna maihta thei ei se tahna a châ. Hebrai reih ta bie theina he Shema ama tah. Mawsi daihti nota Israel sahlaozy cha Khazohpa amâ heisai lei nawpa ta Khazohpa bie cha ama ku liata chahryhpa ta a kei eita, a pathiehna châta ama khi liata ama riepâ. Ama ochhikao tôh liata nata khotho ochhi liata ama roh hra. (Ry. 6:4-9). A yzie cha Khazohpa ama theithlah nawpa ta taopa a châ. Noh hluhpi tawhta Khazohpa bie theina ( Shema) cha zâwpi bievaopa lâta vaw thla laih eita, atanoh keimo ta eima pohkha tlyma, chhôhkha tlyma bievaopa ama tahpa a vaw châ haw. Cha hawhta Beipari sôh he eima nohchareih Khazohpa eimâ theithlahna a châ. He liata achu awpa a ypa cha Beipari sôh zâ nata my tlai ta pie parei awpa a châ. Myla châta tlyma, zâhia châta tlyma eimâ thei tita tao chhyh awpa cha vei. Hâta eikha châta eikha ta sopazy he he apyna nata akaih khao vei. Khazohpa nata eima zâona, nata Khazohpa eimâ theithlahna ta hma lyma awpa a châ. Kaohro lâ tawhta eima rei khiah, Khazohpa athei thlahna cha keimo nata maniah a sangaihna (Sacrament) a châ. Cha liata eima rei baichha khohpa cha Beipari sôh he Sacrament miakha tluta hmobaoh pathaihpa hawhta pachâ awpa he a châ. My nata zâ Beipari sôh thyuna ta Abeipa cha athei thlahha lyma suh vy!

 

9. Beipari sôh he bietaih ahneipa a châ

Khazohpa bie hmâna dâh athaipa (Theologians) nawhzy ta mopathaihpa Zami ta a reipa “Hmotaona ahnei leipa ngiapâna cha athipa a châ”. (Zami 2:26) hawhta hro liata hmopa a y leipa Khazohpa bie achuna cha athipa(Hraoleipa) ama tah hra. Chavâta Beipari sôh theology cha hro liata thei a pathei theipa Khazohpa bie a châ. Biehrai liata pakhona la awpa cha Zerepha nôhmeipa nata hrosôhpa Elaiza kyh a châ. (1Abei. 17:8-16) Elaiza cha Zerepha khih atlô nata a nodi dâhphi kaw ta Zerepha nôhmei tho pahrei a vaw pakhy ngâpa cha vaw awsao ta, ti nata viahchhâ vaw chei awpa ta avaw haw ta, nôhmei chata viahchhâ chala hnei vana, Beipari liata viahdi pazakha deita ei hnei a tah.( v.12) Chahrasala hrosôhpa ta “ Chikha, …… Kei châta viahchhâ na vaw taopa tua la, chakhai nata na saw chapawpa châta tao lava chi” atah. (v.13) Hrosôhpa ta nôhmei hnohta bie ataihpa cha “Isarel râh vasuana a y pakhua hlâ lei cha Beipari rua beih aw vei” atah.(v.14) Hrosohpa reipa hawhta nôhmeipa cha kei tao ta, bietaihpa hawhta ano nata a sawchapawpa, nata hrosohpa Elaiza chhao chata Beiparipa rua beih leipa ta noh hluhpi ama nie. He biehrai tawhta achu awpa peimawh kawpazy cha :

1.      Khazohpa chyhsa châta nie pie awpa he eima hnei nata hnei leipa liata aduapa ta pa châpa cha vei. Zerepha nôhmei ta cha chakâh chaina daihti liata a pie.

2.      Keimo eih (châta) hmiapasah leipa ta Khazohpa chyhsa hmiapasahna he Khazohpa khohzie a châ.

3.      Hrosôhpa reipa hawhta eina hneileipa ta tao awpa a châ.

4.      Khazohpa bietaihpa hawhta nie kyh lia cha phahlana y khao vei.

5.      Beipari sôh piena cha nodi dâhphi kawpa ta athi daihmâpazy châta hro achhaihna a châ.

 

10. Beipari sôh cha sapa nata thlahpa mo pavâna a châ

Beipari sôh he Zisu Krista nie piena hawhta achu khai haw pita, Zisu Krista pati nie eima pie tlaita apietuhpazy châta sapa nata thlahpa lâta mopavâna a châ theipa he hmono-âhpa miakha a châ.Luka 24:28-32 liata eima hmôpa cha Zisu thi ta a thyuheih tawhta Emasa lapi liata asie ngâ penawh hnohta a phuahluah ta, ama siena khih ama tlô daimâ nata Zisu cha chyhsa pakha hawhta pachâ eita ama hnohta tlô awpa hrua eita pati nie awpa hrua hra eita, pati cha chadô khoh eita, Zisu ta viahchhâ cha byhnâ awpa ta pachhaih ta chatawh cha Zisu Krista pati nie a hruapazy cha ama mo pavâ hawta, hmo yzi ama vaw pahno thei haw. (v.31) Zisu Krista ta khizaw lâta âvy chhâna miakha cha mochaopazy mopavâsa awpa he a châ. (Luka 4:18). Khizaw sohna rei patina dâh hawhta khiah cha nie phapa eima nie khiah eima mo pavâ thei ta, chahrasala Zisu pati a pietuhpazy ta mopavâna ama to hripa he Khazohpa hmotaotheina tlai a châ. He kyh liata azaopa ta Beipari sôh cha Zisu pati pahâhpa piena a châpa vâta thokha chhôhkhazy chhao Beipari sôh a pahâhpa sawzy cha châ thaina byhnâzy ama to holopa ta eima pahno. A mianona liata Luka 24:36-46 eima mo tita Zisu Krista Emasa lapi liata a sie ngâ penawh hnohta â luah khai tawhta a pachupazy hnohta chhao aphuahluah heih ta Zisu Krista tlai a châ hi tahpa ama palôh ta alôhleina ama hnei. Chavâta Zisu Krista tlai a châ/thlahmihpa chô vei tahpa ama ngia thei nawpa ta nie awpa miakhakha haw ta, ngasa vaw pie eita, Zisu ta ama piepa ngasa cha anie khai nata a pietuhpazy ta ama pathipalôh mo vaw pavâ haw heih eita, he chhaohe no-âh â chhih kaw. Zisu khaina eima hmô theilei nawpa ta sata ta chyhsa pathipalôh mo a pachao tyh. (IIKawr.4:4). Beipari sôh apie hualuapazy chata Zisu pahno kawh vianapa byhnâ a ypa chhao asia kawpa ta pahno theipa a châ.

 

11. Beipari sôh cha Zisu Krista eima chhôhkha liata ypana ngiana (hmiaseihna) a châ.

Moleina vâta chyhsapa nata Khazohpa cha pachhaihpa ta eima châ hawpa vâta khizaw lâta Zisu a vypa a châ. Khizaw lâta a vy tahpa keimo hnohta pahrâ awpa he a châ. Cha cha eima hro liata eima pahlei hawpa taopathi awpa he a châ. Zisu Krista cha eima ngiapâpa vâta Thlapa pathaihpa ta eima hnohta a pahrâ (Raw. 8:14-18). Anodeikua Khazohpa eima hnohta maniah ypana cha hmiasieh aru kaw. Chavâta Immanuel Khazohpa Zisu Krista eima hnohta a ypa eima pahno thei lyma nawpata Beipari sôh he ngiana miakha a châ hra. Achhâpa cha Beiparo sôh theology eima thabyna cha “Beipari sôh he Zisu Krista a pahâsa chaipa pati a châpa vâta noh chareih Zisu pati nie piepa hawhta a cha. Maniah a ypâpa khichhai tlyma, sikul hawti tlyma eima chhôhkha lia maniah ama ypâna zydua chhôh ta amo châta niepa eima pie tyh. Nie (pati) eima pie chhôh zydua liata cha chyhsazy cha eima hnohta ama y tahpa pahno theipa a châ. Cha hawhta Beipari sôh eima pie chhôh zydua liata Zisu Krista cha eima hnoh ta a y tahpa ngia theipa a châ hra. Lialaipi liata saiso bie ama reipa cha “vao pasapa hlâta chyhsa pasapa a pha via,” tah eita, ei baichha khohpa cha “chyhsapa pasapa hlâta Zisu pasapa a pha via”  tahpa hih. Kaohropa la tawhta eima rei khiah Beipari sôh he Biehrai parohpa liata Khazopa byh hawhta a châ hra aw. Khazohpa byh cha ama sona khih liata Israelzy byhnâ tona a châpa hawhta Beipari sôh chhao he eima chhôhkha byhnâ tona a châ hra aw. Chavâta Beipari sôh a thyutuhpa chhôhkhazy cha Zisu Krista a ypâpa chhôhkha ta liahsa a lôh awpa a châ. Zisu Krista a ypana chhôhkhazy cha ahy hmahta adyuh thei aw veih ei. Pakhona ta Shadraka, Mesaka nata Abeneko zy cha mei liata thypa châ hra ei sala Khazohpa ta a ypa vâ eita mei ta ama viahpakaozy nata ama sâ piekha chhao kâ thei vei. (Dan. 3:19-30). He hawhta Beipari sôh tlai he ta mei chhiepa nata thlih chhiepa tawhta eima bohna a châ.

 

12. Beipari sôh cha MEC Mission chakaona châta râhhmâhpa a châ

MEC Awnanopa liata atanoh taihta Beipari sôh he sôhnawh pipa hawhta alâ mâh leipa ta sôhnaw didiahpa miakha hawh deita a châ. Anodeikua Beipari sôh he râhhmahpa kôvei pha thei ngâsâpa hawhta sôhnawh pipa eima hneipa ta a châ taraw. He kyh nata azaopa ta ei rei khohpa cha Zisu ta mopathaihpa Pity hnohta a pahaona bie, “Athupa lâ pangai la, nga hluhpi patu awpa ta athu lâ na saozy vawh teh”. (Luka 5:4). He Zisu Krista ta arei ngâna su he Kalali tipo kiahpâh liata a châ. Kalali râh he Zisu Krista daihti liata Palestine râh liata maluh hluhchaina su a châ. Zisu ta ngapatuhtuhpa Pity cha chyhsa patutuh awpa ta a aw. Akathu viapa lâta……tahna yzie cha nga hluhpi yna su tah theipa a châ. Chavâta Kalali râh liata chyhsa hluhpa nata akathu viapa liata nga hluhpi y theina cha pakhopa a châ thei aw. Kaokha lâ tawhta eima rei khiah Kalali râh he chicheina châta alei pahâh pha kawna su a châ. Cha hmo yzi tawhta akathu via lâta sao vaw teh tahna cha “râhmâhpa chho teh” tahpa nata alyu. Achhâpa cha râhmâhpa liata chicheipa kôvei hluhpi apua thei. Sôhpaliena (Economics) kaolâ tawhta eima rei khiah cha râhhmâhpa cha sôh hluhpi hmô theina su tah theipa a châ. Nga patuna kyh liata ti aphohpa liata sao vawpa cha nga laipa nata nga hluhpi patu thei aw mapi. Beipari sôh he rei chiehpa hawhta mission chakaona châta râhmahpa chata anodeikua akathu viapa lâta sao vaw leipa hawhta kupazâh kha ta eima pie tyhpa vâta Zisu ta maniah a pahaopa cha kô a vei thei chaina su a châpa râhmâhpa chho awpa he a châ. Râhmâhpa eima chhona dâh awpa cha Beipari sôh he Zisu Krista pati piepa hawhta piepa châ awta my pavâ nyukha, zâ pavâ nyukha Zisu Krista nie â kadaihna taihta pie awpa a châ. Cha hawhta MEC chhôhto zydua ta eima pie khiah cha akô vei theina dâh cha  odyh dyhkha ta kôkha thyu theipa cha sapha phi 10.5 a châ aw. Cha châ eima zua khiah cha Lialaipi rate ta phikha ta 10.5 x 6000 = 63000 Ks. A châ. Pasai tlâh rate ta cha 10.5 x 3000 = 31500 Ks. a châ. Average ta eima chhuh khiahta cha 47250 Ks. a châ. MEC râh odyh maluh cha achyh chaipa ta 3000 a châpa vâta Beipari sôh eima thyu thei awpa zie cha 3000x 47250 = 141750000Ks a châ aw.

 

13. Biepachhana nata hriapazina dah

Beipari sôh he sôhnawh rôhnâh kawpa nata MEC ta avaw tao beih leipa lyu(râhmâhpa) chata atakô tawhta eima mission chakaona liata sôhzy phahlana a y hawpa vâta he râhmâhpa he chho awpa ta MEC Assembly ta avaw pasaih haw. He chhao he rei chiehpa hawhta Khazohpa ao ta eimâ pyh. Beipari sôh he Mission chakaona châta sopa a châpa chhao he Khazohpa bie nata ahmie kawpa a châ. Zisu Krista pati piena hawhta so lyma awpa a châ. A byhnâ to theina nata a râh kawh theina cha Khazohpa raihria ta a pahawh sila, a thyuna nata a hriapazina dâh deikua he ei thei lei awpa biepiepa peimawhpa mission chakaona a châ vâta tiamâ papua suh vy! Chavâta ary lâ hawhta MEC Awnanopa ta a hriapazi awpa saduthliena ei tao.

1.      Local tota Beipari sôh bia padua awpa

2.      Beipari sôh pakhy tita odyh, a thyutuhpa moh nata ama thyunazi record siapa tao lyma awpa

3.      Hâta chareih ta Beipari sôh pakhy lyma awpa

4.      Beipari sôh bia to tawhta pakhypa zydua local church liata combined record sianopa tao awpa

5.      MEC office liata Beipari sôh account eihpa tao awpa. RTS account liata pahlao khao lei awpa tahna a châ.

6.      Local chhôh liata Beipari sôh a thyuthei chaipa top ten atly ta kôchareih palyupalihna tao awpa

7.      Thyuna palôhphao liata Zisu Krista nie pati piena hawhta thyu awpa a châpa vâta my nata zâ beih chhona maihta pavâ nyukha chyu pie awpa. He he eima râh chhôh liata ama chôhka liatata pati aniepazy châta a châ via pachai.

8.      Mara Diaosporas zy châta nohkha ta ama râh liata hmâpa currency hawhta tlawkha chyu so lyma awpa.E.g. Malaysia liata a ypa chhôhkha ta Malaysia Rigi tlawkha, Australia liata a ypa chhôhkha ta Australia Dollar tlawkha etc.

9.      Local church liata Beipari sôh thyuna nata azâopa ta thlakha liata eikha chhâ pahanoh service my supi liata testimony pareisa awpa

10.  Beipari sôh he mo pakha ta chakaopa chaleipa ta a chhôhkha ta chakao awpa a châ.

11.  MEC office tawhta Shema “Beipari sôh cha Zisu Krista ta apaha sa chaipa Mission chakaona pati, Zhn. 4:34” tahpa Beipari byh liata taw awpa apatôhpatia aw.

12.  2011-2012 kôchhôh ta Beipari sôh ngâchhihpa ta athyu theipa odyh 700 chha pitlôh thei awpa ta arâpasua awpa    .

 

He hawhta ahyrai MSA Websites liata Marasawzy châta phahnai tahpa ta aroh khohpazy ta rohpa ta This e-mail address is being protected from spambots. You need JavaScript enabled to view it liata tlyma, This e-mail address is being protected from spambots. You need JavaScript enabled to view it lata tlyma paphao thei lymapa acha. MSA Web team ta avaw soh lyma aw.

 

He 

Last Updated on Tuesday, 21 June 2011 09:29
 
 

Peimawhpazy!

Featured Links: